أغانى أطفال الروضة

أغانى أطفال الحضانة

البطة توتة
هحكيلكم حدوتة عن البطة توتة
مرة كانت جعانة قالت لمامتها
مش لاقية يا ماما ولالقمة صغنتوتة
البطة الكبيرة وقفت فى الحظيرة
نادت كل ولادها قالت كل واحدة
تروح البحيرة فيها أسماك كتيرة
طلعت تجرى توتة
عامت فوق المية تعبت رايحة جاية
لكن بعد شوية أصطادت سمكاية
أكلت لما شبعت وفى النهاية رجعت
فرحانة ومبسوطة
وادى حكاية توتة


جبت لماما
جبت لماما هدية صحبة ورد جميلة
وردتها مندية وهقدمها الليلة
ماما شمس تنور وحنان بيدفينا
تتعب أكترواكتر وتحقق أمانينا
جوة قلبى شايلها وكمان جوة عنيا
حوشت فحصالتى جزء من المصروف
علشان خاطر مامتى اللى تساوى ألوف
شفت الورد عجبنى نقيت منه شوية
وجبت لماما هدية

أمهات الرسل
أمهات الرسل يا أعظم المثل
فى الصبروالايمان وأحسن العمل
أمهات الرسل أمهات الرسل أمهات الرسل
يا هاجر الحسناء يا أم إسماعيل
أظهرت فى البلاء كل الصبر الجميل
فأتى الوليد الماء من زمزم سلسبيل
أمهات الرسل يا أعظم المثل
فى الصبروالايمان وأحسن العمل
أمهات الرسل أمهات الرسل أمهات الرسل
بشرى يا أم موسى من عند رب الكون
سيرد الله موسى ويهزم الفرعون
أمهات الرسل أمهات الرسل أمهات الرسل
يا مريم العذراء يا أطهر النساء
بشرى يا أم عيسى بشرى من السماء
امهات الرسل أمهات الرسل أمهات الرسل
رعيت آمنة محمد اليتيم
صارابن عبدالله نبينا الكريم
أمهات الرسل

اللى يكبرإيه
اللى يكبر إيه يا سلام
يبنى العقل مع الاجسام
ربنا خلى الاكل كتير
علشان تبقى الصحة تمام
واللى يكبرإيه يا سلام
مين كل لحمة وسمك مين
جسمه هيفرح بالبروتين
عضلاته هتكبر لازم
زى مصارع وملاكم
وبطل كاراتيه مع الفايزين
واللى يكبر إيه يا سلام ........
آدى الفواكه والخضروات
فيها معادن وفيتامينات
جزر وجرجير وطماطم
والبرتقال والموز لازم
يحمينا من كل الامراض
واللى يكبر إيه يا سلام .......
أنا جى ليكم وبنادى
عندى لبن عندى زبادى
واللى حيشرب أو ياكل
جسمه هيكبر يا ولادى
بالبروتين مع الكالسيوم
واللى يكبر إيه يا سلام


بسم الله
بسم الله بسم الله
أحلى كلام اتعلمناه
لما ناكل لما نشرب
لازم كلمة بسم الله
لما نجرى لما نلعب
لازم كلمة بسم الله
لما نقرأ لما نكتب
لازم كلمة بسم الله
بسم الله بسم الله







الفراشة
مسكت علبة ألوانى وقعدت اشخبط شخبطة
لاقتنى راسم قدامى فراشة حلوة منقطة
وقبل ما أقفل كراسى لاقيتها طايرة مزقطتة
جريت عشان عاوز امسكها أتريها آخر عفرطة
ساعتين وراها وانا بجرى طنطيت وجرىوشعبطة
تعبت خالص فجتنى فكرة
لذيذة خالص جهنمية
رسمت فى الكراسة وردة
جميلة خالص بنفسجية
جت الفراشة وقفت عليها
ادينى جبتك يا شقية
لى لى لى لى لا


إحنا الطيور

إحنا الطيورفى السما بنطير
لينا الجناح والريش دة كتير
ناكل ونشرب بالمنقار
زى الحمامة و العصافير
بنطير ونبحث شرق وغرب
ع الرزق كان سمكة أحب
ولما نتعب نقول يارب
افتحلنا أبواب الخير
فينا اللى طاير طول اليوم
وتلاقى وزة وبطة تعوم
وآدى الجوارح نسر وبوم
ونعامة ما بتعرفش تطير
فينا اللى صاحب للإنسان
أبو فصادة وأبو قردان
سمعنا صوتك يا بغبغان
قلد لنا أصوات الغير


روحنا على الجنينة

روحنا على الجنينة نادى الفيل علينا
حيانا بزلومته وأكلناه بايدينا
شفنا كمان الدبة ماشية حبة حبة
ولعبنا مع القردة وفرحنا وغنينا
والأسد بصلنا ولا مرة خوفنا
والنمر المخطط خوفناه بعنينا
والزرافة فى بيتها مدتلنا رقبتها
قالت آجى معاكوا قلنلها يللا بينا
وركبنا العربية للأحياء المائية
شفنا كتير أسماك والسلحفاه الشقية
وروحنا على الجنينة


قلمى صغير

قلمى صغير نوعه رصاص
بارسم بيه جوة الكراس
بحر أزرق واسع وكبير
وأنا جواه نازل غواص
لى لى لى لالا....
شفت حاجات فى البحر عجيبة
وفى أعماقه حكاية غريبة
شفت اللؤلؤ والمرجان
والدولفين صاحب الإنسان
لى لى لى لا لا
والحوت ماشى ضخم كبير
ياكل م الأسماك طوابير
سمكة عجبة بتهرب منه
علشان ليها جناح بتطير
لى لى لى لالا
قلمى صغير نوعه رصاص
بارسم بيه جوة الكراس
بحر أزرق واسع وكبير
وأنا جواه نازل غواص
وانا جواه نازل غواص
وانا جواه نازل غواص

واحد اتنين واحد اتنين
مرة شفت ولد مسكين
تلاتة اربعة تلاتة اربعة
كانت هدومه متقطعة
خمسة ستة خمسة ستة
خدته البيت واديته جاكيته
سبعة ثمانية سبعة ثمانية
أنا أسعد إنسان فى الدنيا
تسعة عشرة تسعة عشرة
يا بخت اللى يساعد الفقراء



كنتى فين يا شمس

كنتى فين يا شمس
أنا زعلان لغيابك
وغروبك م الأمس
كنت بقرصى الأحمر
يا صاحبى بنور
نص الأرض التانى
من غير ماانت تحس
من فضلك يا شمس
فهمينى أكتر انا لسة متحير
بص يا صاحبى نور
الأرض دى كورة
حوليا بتدور
نصها يبقى قصادى
فيها نهار ونور
أما النص التانى
ليل وظلام وسكون
شكرا ليكى يا شمس
انا دلوقتى فهمت
ووعيت قوى الدرس
طبق السلطة

طبق السلطة يا طبق السلطة إنت عازمنا عليك الليلة

واحنا هنيجى يا طبق السلطة وتعرفنا بكل العيلة

يا سلام سلم آدى العيلة ع الصفين واقفين ياحليلة

أدى جزراية وطمطماية وادى خساية وادى جرجير

وادى كمان الست خيارة أصل العيلة عددها كبير

واحد واحد يجى بنفسه يشرحلنا من غير فوازير

أنا الفلفل ناعم وجميل منى قصير منى طويل

تاكل مشوى تاكل مألى كل زباينى لطبئى تميل

أخضر زى عنين الؤطة أحمر زى ودان الفيل

وانا واخواتى بنعمل سلطة مع بعضينا فى طبق السلطة

طبق السلطة يا طبق السلطة إنت عازمنا عليك الليلة

واحنا هنيجى يا طبق السلطة وتعرفنا بكل العيلة

أنا خياراية ومن العيلة طبعا كل الناس تعرفنى

أنا بتقطع جنب اخواتى ألاقى ايدين عمالة تخطفنى

خدنى وكلنى أول باول أما اتملح وابقى مخلل

وانا واخواتى بنعمل سلطة مع بعضينا فى طبق السلطة
طبق السلطة يا طبق السلطة إنت عازمنا عليك الليلة

واحنا هنيجى يا طبق السلطة وتعرفنا بكل العيلة

أنا جرجير والأجر على الله وانا على فكرة كلى حديد

صاحبى الخضرى بيحزمنى وابقى مرعرع كدة وسعيد

أما أكلنى كمان شمشون هد المعبد هد حصون

وانا واخواتى بنعمل سلطة مع بعضينا فى طبق السلطة

طبق السلطة يا طبق السلطة إنت عازمنا عليك الليلة

واحنا هنيجى يا طبق السلطة وتعرفنا بكل العيلة

أنا خساية بصو شفونى الحلوين ياما ياما أكلونى

شعرى طويل شكلى جميل شايل اكتر من فيتامين

شوفو المنظر زى السكر لاتقولى شانيل ولا قصير

دايما مكسى ودة من خجلى

وانا واخواتى بنعمل سلطة مع بعضينا فى طبق السلطة


طبق السلطة يا طبق السلطة إنت عازمنا عليك الليلة

واحنا هنيجى يا طبق السلطة وتعرفنا بكل العيلة

وانا كمان الست طماطم خدنى هدية من الفلاح

ناس بتقولى يا مجنونة صاحبى يقولى يا تفاح

تشرب منى عصير متصفى تاكل منى برده مباح

وانا واخواتى بنعمل سلطة مع بعضينا فى طبق السلطة

طبق السلطة يا طبق السلطة انت عازمنا عليك الليلة

واحنا هنيجى يا طبق السلطة و آدى عرفنا كل العيلة

و آدى عرفنا كل العيلة و آدى عرفنا كل العيلة